有次男友搭飛機時無意間睇到介紹沖繩嘅資料，原本決定咗去蘇梅同佢慶祝生日都即刻轉軚話去沖繩。
聽說沖繩係一個風景怡人兼潛水嘅好地方，潛水嘛... 我哋兩個連都唔識游水... 潛乜鬼... 之但係佢生日嘛，當然係佢揀地方；我去準備喇！(其實蘇梅都係一個潛水嘅好地方，但係我就係鍾意泰國嘛！)
定咗日子喺三月尾出發，就開始上網爬文喇！
香港去沖繩嘅 Airline 不多亦不少，起碼上至國泰下至樂桃都有；而我就揀咗香港航空，去程朝早七點幾，返嚟下午三點多，時間尚算實用，唔錯唔錯！
機票搞掂就到租車喇！其實只要上網一 search，就會搵到 OTS，揀啱日期同車型就搞掂喇！
然後到訂酒店喇！我哋去六日五夜，頭兩晚打算住喺南部，之後三晚就住喺中部。
位於沖繩南部嘅「那霸」都算幾多酒店，喺 TripAdvisor 度睇咗啲真實相片同評語後就揀咗頭兩晚住 Hotel Rocore Naha。佢兩晚夾埋 JPY30,400 包埋早餐，附近仲有埋 PARKING，由於係全程自架，所以呢個都係我哋其中嘅一個 concern。
沖繩中部嘅選擇比起那霸少... 同貴，無計喇，有大大個海景任你睇，而房嘅面積亦相對較大。比較過後揀咗 Kafuu Resort Fuchaku Condo Hotel 嘅 Deluxe Condo，三晚連早餐同泊車都係 JPY70,500。
機票、租車同酒店都搞掂之後就到行程喇！我同男友去旅行，都係鍾意無壓力嘅，要編定邊日幾點去邊度，趕 Check Point 我一定唔得。去旅行嘛，我哋都認為應該自由一啲。
男友工作比較忙，所以景點方面嘅資料都係等我嚟喇！
以前去旅行都會習慣買旅遊書，但係自從上次去大阪，書入面所介紹嘅嘢完全吸印唔到我，然後自己上網爬文搵資料，今次沖繩之旅我決定唔買書，上網靠大家！
經過多日嚟嘅資料搜集，我整咗一本旅遊書仔。早前大阪自架遊因為無圖，男友只係睇個名都唔知係乜嚟，所以今次加埋最吸引到我嘅相落去，咁就更加一清二楚喇！
原來沖繩除咗潛水，仲有好多好嘢食、買、玩！好期待呢！
** 等我同大家分享吓搵搜集返嚟嘅資料喇，有埋地圖去到即日先決定去邊都仲得！
